كلمات : الشاعرة ريم صلاح
مين ف العالم كُلُّه استحمل
ألوان الأحزان علشانك
واتعوّد على طول هجرانك
إنما وقت ما ترجع تلقى
كل مشاعره بتستناك
تلقى هناك
قلبه وعقله وروحه
ف طوعك ؟
مين من وسط العالم كُلُّه
لمّا تقول الأه بيكونلك
من قبل وجيعتك موجوعك ؟
وامّا الليل العتمه يشدّك
مين بتلاقي ..
كل صوابعه العشره شموعك ؟
راجع نفسك ..
وامّا تلاقي إجابه ح تعرف
حجم الظلم بتاعك ليّا
حجم الأهه النايمه ف قلبي
حجم الحزن البايت فيّا
حجم الفرح اللي زرعتولك
واللي جنيته دموع ف عينيّا.
